天鴿 攞景定贈慶

經過尋日十號波之後,香港應該冇人唔識天鴿,多得天鴿,好多人得以放一日假,陪下家人朋友飲茶、打牌、打機、煲劇等。森而身為一個雙失中年,其實打唔打風都唔關我事,反正我日日都陪緊家人,而天鴿呢個名字對於森而嚟講,亦唔係一個颱風,而係一隻幾日前被沽空機構追擊,繼而急跌兼停牌既股票:天鴿互動(1980),天鴿互動停牌幾日,颱風天鴿就來襲,就好似攞景兼贈慶,諷刺森而買中妖股。

邊個做好心放生我呀!

天鴿互動盤數究竟有冇造假,森而就不得而知,只知道大陸10間公司有9間盤數都有水份,只係吹得有幾大咁解,投資得呢類4、5線民企都預左有造假風險,只係估唔到天鴿連爆升都未爆升,咁快被人踢爆造假,未爆升過又點暴跌呢?追擊當日股價只係跌7%,沽空機構揀天鴿來追擊,真係唔多明。

當初森而揀天鴿互動,係因為見間公司食正網上直播熱潮,試想連大台都要攪個自家明星直播app,就可見網上直播呢條水真係幾好搵,直播行業快速增長之餘,天鴿業績又有錢賺又有息派,實屬難得。須知道賺到錢既科網公司其實冇乜幾多間,大部分都停留係燒錢階段,就算被多間大行及財演推介既美圖(1357)都係一毫子都未賺過,既然冇錢賺都話值得睇長線,何況係一間已經有錢賺既公司,所以幾個月前就將天鴿互動納入觀察名單,冇耐交易系統就發出買入訊號,到上月再加注,跟住就出事。

買左停牌既股票可以點做?咪唯有等囉!森而望過下關於追擊報告既新聞,公司應該冇乜嘢可以反駁,雖然公司第一時間死撐,但之後似乎連撐都唔想撐,乾脆停左牌去就算,等時間一日一日咁過,完全冇晒消息,加上天鴿互動本身並非甚麼熱門股,連新聞都冇乜點提過,間公司好似從此消失於市場一樣,森而而家冇嘢驚,最多咪當輸晒,輸晒就係組合既3%,都唔算好入肉,唯有係其他地方賺返,好彩係最近幾日個市好返好多,之前放既7支箭升返唔少,市場氣氛完全唔同晒,回復慢牛勢頭,繼續28000 gogogo,其中1支箭2318出左份靚業績之後,非常之強勢,唔駛蝕仲開始賺緊,一下子變得形勢大好,希望2318之後繼續保持強勢,今年之內衝去100蚊大關。

經過天鴿來襲之後,有人屋企啲窗冇晒,有人泊停車場啲車都冇埋,至於森而,雖然表面上冇乜傷痕,但就好似隻海膽咁,無啦啦受左一下無妄之災,但願有人可以做個好心,好似放生海膽咁放生森而。

14 則留言:

  1. 停牌係對付沽空方法, 耍搵錢同人打!

    回覆刪除
    回覆
    1. 搵到錢就有得打,最怕無了期停牌,到幾年一復牌就唔見9成。

      刪除
  2. 呢篇正喎, 一詞兩用.
    不過唔重倉唔怕啦, 個風都係一日0者~

    回覆刪除
    回覆
    1. 真係咁啱得咁撟,大家都叫天鴿,其實股票天鴿互動停牌對森而影響唔算大,始終唔係重倉,反而颱風天鴿影響大啲,因為森而一家、大佬一家、連同兩老早已經訂晒酒店船飛下星期一過澳門玩,而家都唔知去唔去得成。

      刪除
  3. 回覆
    1. 好難完全唔買大陸股,唯有小心啲揀!

      刪除
    2. 大陸股我只持有 405,87001,但整體回報也不算失禮吧。

      刪除
  4. http://hk.on.cc/hk/bkn/cnt/finance/20170827/bkn-20170827182111538-0827_00842_001.html

    回覆刪除
  5. 大陸野, 預左有機會中招, 森而兄當買經驗吧. 我自己都中過招了.

    回覆刪除
    回覆
    1. 投資股票耐唔多唔少一定中過招,今次森而只係蝕十零%算好彩啦!

      刪除