著重過程 跳出短期結果

最近天氣真係好難頂,又熱又局,所以森而已經暫停跑步計劃,取而代之係趁囝囝學游水既時候去隔離池操水,N年前森而仲係廿零歲既時候,一到夏天時不時會係放工後到泳池操水,每次60個堂,呢個習慣已經停左至少十年,十幾年後再操返體能當然唔可以同以前比,第一次只能游到10個堂,之後每次加5個堂,對上一次已經游到25個堂,都算係咁啦!運動多左,keep fit計劃都有少少進展,但離減20磅仍有一段距離,要加緊努力先得。

十幾年後再操

講返投資,恒指連升7月,每月千幾點咁升,話咁快就到27000,耳邊開始聽到「恒指40000不是夢」既聲音,除左類似牛二、牛三、大時代2.0既評論之外,近期亦開始多左人曬身家、曬回報,吹噓自已既投資表現如何厲害,情況就好似2015大時代一樣。特別係有一類想靠吹搵食既人,贏果時就吹噓,輸果時就隻字不提,呢種行經有時真係令人作嘔,幸好想靠吹搵食暫時都唔算多,其他大多數人曬都只不過想分享賺錢既喜悅。

分享喜悅實屬無可厚非,不過如果發現自己唔覺意表現出嬴就博命曬,輸就扮失憶既行為就要小心,因為太在意別人看法容易扭曲心理,久而久之會十分著重短期結果,務求更快更多地公佈好結果,將短期績效無限放大,隋之而來亦會逃避失敗,對犯錯視若無睹,例如當有利潤盡快止賺以公佈天下,面對下跌卻不肯止蝕承認犯錯,營造出只有嬴沒有輸既錯覺,自欺欺人。

其實短期結果極為隨機性,任何一位大師都有機會接連失利,任何一個柒look都有連嬴既時刻,實在唔應該太過著緊,更加唔值得吹噓,投資應該著重過程多於短期結果,例如投資過程是否符合個人長遠計劃?有沒有偏離當初投資原意?有沒有違反自己操作守則?如果投資過程中違反上述任何一點,卻能夠係呢一刻連續獲勝,咁只能夠說明自己短期夠運,唔代表投資能力或技巧出色,自己係靠運氣定靠實力嬴錢,一定要攪得清清楚楚,沉醉係短期結果最終只會傷害到自己,再舉一個已經用過既例子,如果買入一隻股票係收息,當股票停派息兼連年下跌之後,因為唔想認輸而拒絕止蝕,幾年後股票突然被炒起而獲得數倍回報,無錯就短期而言結果非常好,但過程已經明顯係犯錯兼且違背原意。

要成為出色投資者,應該要學懂跳出短期結果,著眼於整個投資過程,要設定最適合自己並能提供滿意回報既方法,貫徹地執行,期間盡可能減少犯錯,做到不偏離原意、不違反原則,不需固執於單一戰績,只要長期回報符合個人目標。

上週操作重點:

24/7

買入1848 @ 9.44

26/7

期權平倉:1299 long call 7月 $60 @ 0.59,回報69%

28/7

1. 增持 1980 @ 6.18

2. 增持 1066 @ 6.45

3. 期權行使:0688 short covered call 7月 $24,帳面賺11.6%

4. 期權結算共收權金$29,419

5. HSI long put 8月 26600 @ 220

9 則留言:

  1. 森而兄, 同意"要成為出色投資者,應該要學懂跳出短期結果,著眼於整個投資過程"。

    做回運動,這個投資亦很重要,我也要努力一下。 哈哈

    回覆刪除
    回覆
    1. 係健康、家庭兩每方面既投資,絕對比事業、金錢重要。想努力一下就馬上開始,唔好等!

      刪除
  2. 我都開始計劃游水,雖我唔係好識游,只可游一兩堂就要停,但我都幾享受游水的過程。之後我就會練返跑和羽毛球。

    回覆刪除
    回覆
    1. 無論咩運動都好,一有時間一定要操下,對身體或心靈健康都有好大幫助,投資時都得心應手啲。

      刪除
  3. 森而兄呢一篇blog文既主要意思同小弟一篇舊文類似: http://dreamandinvestment.blogspot.hk/2016/09/blog-post_28.html , 一個好結果, 不代表決定正確.

    回覆刪除
    回覆
    1. 呢篇文有印象呀!意思係有啲相近似,但Joseph寫得詳盡清晰好多。

      刪除