2017年7月17日 星期一

為何投資難守紀律

唔經唔覺森而已經放假整整一個月,對上一次可以放一個月假係囡囡出世,換言之已經係3年前既事,放假感覺真係好爽,可以做自己想做既事,本星期就完成左兩堂潛水,包括星期四晚泳池同星期日出海,如果計出海遊船河森而起碼10年未玩過,點知一出海就落雨,好彩落雨冇影響行程,仲知道原來好多香港人鍾意潛水,因為係我地附近仲有4、5隻船都玩緊潛水,大大話話有成5、60人係個海到,感覺好熱鬧。可能因為天氣唔好,今次潛水時能見度極低,第一次落到水底直情乜都見唔到,第一次玩就遇著呢種情況感覺都幾驚,幸好轉個位置後再嘗試就清啲,起碼見到教練指示,最後亦順利完成進度,教練話今次係一次好好既體驗,感覺好似夜潛,唔係人人有機會試到喎!

出海先嚟落雨

講返投資,上星期大市突然急升,恒指4日大升1000點,殺淡友一個措手不及,森而一向對後市不作預測,睇法永遠50/50,操作盡量保持紀律性並以機械式執行,好多時既有好倉亦有淡倉,今次急升有股票期權好倉錄得倍升,但上星期開倉既 HSI short strangle 卻損失不少,突然間諗起期權有一招 dynamic hedging 動態對沖,之前因為要返工無暇兼顧,而家既然放假就不如再重新再嘗試,睇下可唔可以救返呢次損失。

提到保持紀律性,上篇文章blog友留言話散戶容易自亂陣腳,容易左一巴右一巴,森而回覆話大多數散戶都無一套完整投資系統,無系統又何來紀律呢?今次想就呢個話題再講多啲,一般散戶係投資系統同紀律性上容易出現既問題。

首先,多數投資者都會先選定一批股票作為觀察名單,但對於應該何時買入或賣出,卻好少會有一定準則,有時見跌左就買少少,有時見賺左又賣少少,不過如果有負面消息時,跌左都唔敢買,相反有利好消息,又會無啦啦去高追,而最奇怪但又有好多人鍾意用既方法,係用假設既數字來計算一個假設既價值作為買賣指標,以上方法都看似有系統其實係隨心所欲,想買就買,想賣就賣,冇系統自然冇紀律。

即使設計好一套投資系統,但任何投資系統都冇可能係任何時候都賺錢,當連續幾次買賣蝕錢,或者跑輸大市,多數散戶會覺得洩氣並放棄,就算唔放棄都會一改再改,輸一次改一次,自然面目全非,原本打算收息變為冇息長揸博倍升,其實投資系統應該睇長期平均表現符唔符合自己目標,而唔係要同人比較,間中輸錢或跑輸大市其實唔緊要,完成得到自己目標就係好系統,無需放棄或改變。

另外最易令散戶放棄投資系統或失去紀律性就係遇到熊市,多數散戶遇到大跌市時,眼見投資組合見紅,便會對股市失去信心,一心只想盡快沽清所有股票,或者無眼睇由得啲股票跌,期望有朝一日返回家鄉,什麼系統、紀律都忘記得一乾二淨,要解決呢個問題,就要係設計系統既時候加入退出機制,要未諗贏先諗輸,做好跌市準備到時就唔會慌失失唔知點算。

除左跌市,有時升市亦會令散戶失去紀律,好多散戶都有一種奇怪心態,買入後股價跌左唔驚,因為覺得平左抵左可以加注,但如果股價升左反而先驚,日日擔心股價打回原型甚至倒跌,將盈利化為烏有,有乜依郁就拿拿林食糊袋袋平安,又將原來系統拋諸腦後,既然跌又唔守紀律,升又唔守紀律,有系統等如冇系統,投資成績又點會好,blog友話左一巴右一巴真係無錯。

本週操作重點:

10/7

期權開倉:0941 short put 80 @ 0.45

12/7

買入1558 @ $20

13/7

改變期權策略:於5/7開倉HSI short strangle 原打算博一星期賺30~50點,但因恒指突如其來急升而失敗,決定改變策略以dynamic hedging 應對。






15 則留言:

  1. 是的,不少散戶連自己買入的股票有甚麼優劣都不知,因此每天甚至每分每刻都受股價上落而影響情緒和投資決定,在情緒主導下很難談紀律。

    回覆刪除
    回覆
    1. 情緒主導投資係最常見問題,其實要做好投資/投機,最重要係先處理好心理問題,例如控制好情緒、心態要正面、邏輯思維要清晰等,其次先到知識、技術等。

      刪除
  2. 散戶比較少自己的投資系統,多是中number降

    回覆刪除
    回覆
    1. 對,不少散戶想賺錢但又懶想走捷徑,希望靠其他人既努力幫自己發達。

      刪除
  3. 老散和高手都是人,人就有人性,有認知偏誤,會做出違反邏輯的行為來。如果不明白人性的弱點,就很難堅守紀律。好像本文最後一段,就點出了三種認知偏誤:

    一、不對稱的賭性:人在虧損時賭性會放大,在賺錢時會傾向穩定性,結果「贏粒糖輸間廠」。

    二、損失避規:無論損失有幾微不足道,人在預期損失時會設法避開,結果止賺止蝕位往往與買入價很相近。

    三、錨定效應:在買入時,人會把買入價看成是一個「錨」,錯誤地將賣出時機與買入機連成一線,忽略了對買賣決定的原始判斷力。

    回覆刪除
    回覆
    1. 謝Rx10兄在學術性方面作出補充,人性大多以情緒行先,很少人能經常保持理性,其實日常生活感性啲唔緊要,但當面對金錢問題時最好還是保持理性。

      刪除
  4. 若股票期權救倉買兩邊本熊會睇按金分佈做hedging,但若真是單邊市是無得hedge 的,做得手數過多按金跳上跳落太快更容易出錯,只是有益於券商
    其實一兩注錯誤就隨它去吧,森而兄有其他注碼有倍數升幅,一個月下來有贏便值得高興

    回覆刪除
    回覆
    1. 股票期權森而未試過動態對沖,通常只會買單方向好或淡,原因係股票升跌可以好急,1日5~10%都經常見,根本做唔切對沖,而且交易量低就更加難以成交。至於期指期權就唔同,只要有時間能跟蹤大市,能夠係適當時間做對沖,理論上無論上落市定單邊市一樣可以做到。
      其實森而唔係因為唔憤氣輸錢先去博,只係既然難得有時間,何不比自己嘗試,就當鍛鍊一下自己身手,贏輸反而其次。

      刪除
  5. 本熊見森而兄long 2318咁成功想模仿一下,找了2328 想追落後,但似乎越拉越遠,睇多兩日也許要認賠

    回覆刪除
    回覆
    1. 森而覺得long call或long put一隻股票最緊要係見到有明顯趨勢,只要趨勢不變就要一直保持倉位,要有心理準備輸晒全部,要明白輸唔緊要,只要一舖就可以贏返晒。

      刪除
  6. 愈看其他blog,愈覺得機器人的心態非常老散。期待森而爸爸更多的分享。

    回覆刪除
    回覆
    1. 愈睇得多blog,就發現其實好多滿口道理扮高深,行動既時候都係老散一名,包括森而都係!

      刪除
  7. 作者已經移除這則留言。

    回覆刪除
  8. 森而兄的新blog背景很美, 一片藍天! 我喜歡!

    回覆刪除