蘇黎士投機定律 (附加手繪禮品推薦)

上月股市太勁,直情升到有啲驚,特別係內銀股,有啲似2015年咁跳制式爆升,1個月左右就升3成,森而上次提過自己早已滿倉,正股組合升幅跟到大市,可惜建行(0939)爆升時已經無錢加注,錯失大好機會。除錯失機會之外,期指期權又犯左兩個大錯,原本只係想對沖,慢慢見個市超買再超買,竟然大師上身,唔覺意做淡做多左,最後結果當然被夾爆,機乎將正股回報完全還返出去,真係想喊,牛市無份賺果種痛苦,唔係人人明白。今次受左教訓,學到好多嘢,將來必定十倍奉還。


最近睇本書叫「蘇黎士投機定律」,內容係歸納瑞士證券和期貨投機俱樂部所提出既投資建議,看似簡單既投機定律,卻並非人人了解。個人認為,呢本書非常適合偽價值信徒睇,特別係背大師金句背到滾瓜爛熟,但投資成績仍然麻麻既人,睇完後表現可能會突飛猛進。

滿倉+對沖

自從上年12月中開始,股市便一路回升直到而家,期間機乎無乜停過,因此主要以追蹤趨勢為主既交易系統多次發出買入或增持訊號,於是森而按紀律買入例如光大國際(0257)、中國高速傳動(0658)、康哲藥業(0867)、信義光能(0968)、中國生物製藥(1177)、金山軟件(3888)等多隻不同股票,大約用左兩個多禮拜時間,即月初3號,基本上已經耗盡資金達至滿倉。由於唔想去得太盡,所以唔打算動用孖展,而大量未能執行既訊號,可以的話就盡量以期權代替,無期權就唯有選擇放棄,所以今個星期基本上已經停晒手等運到。現時正當恒指31000點之際,好多人都已經擔心風高浪急,呢個時候滿倉風險確實唔細,所以係滿倉之餘,森而亦適量地以恒指期權來對沖,以防淡友突襲,求個安心。


近況及目標

森而上一次寫blog已經4個月前,當時因為接近9月,打算專心搵份新工,停一停等安定好之後再寫,經過4個多月時間,森而仍然未有工作,原因係搵唔到一份似樣既工作,唔係長時間就係低人工,真心唔想再為五斗米折腰,再浪費多廿年光陰,所以決定暫停搵工,比一至兩年時間自己,專注去做好各樣投資或投機。一般人肯定會反對森而呢個決定,認為投機炒賣唔夠踏實,但森而好清楚自己咩料子,既然打左咁多年工都冇乜成績,再打多廿年工結果都只會一鳩樣,不如先試下第二條路,即使係死路一條都絕不後悔。回想過去廿年返工佔太多時間,生活基本上只有返工、放工、等出糧,老套啲講就係同條鹹魚一樣,而家趁仲有最後最後一點火,就比自己任性一下,換一次發夢機會。


天鴿 攞景定贈慶

經過尋日十號波之後,香港應該冇人唔識天鴿,多得天鴿,好多人得以放一日假,陪下家人朋友飲茶、打牌、打機、煲劇等。森而身為一個雙失中年,其實打唔打風都唔關我事,反正我日日都陪緊家人,而天鴿呢個名字對於森而嚟講,亦唔係一個颱風,而係一隻幾日前被沽空機構追擊,繼而急跌兼停牌既股票:天鴿互動(1980),天鴿互動停牌幾日,颱風天鴿就來襲,就好似攞景兼贈慶,諷刺森而買中妖股。

邊個做好心放生我呀!

天鴿互動盤數究竟有冇造假,森而就不得而知,只知道大陸10間公司有9間盤數都有水份,只係吹得有幾大咁解,投資得呢類4、5線民企都預左有造假風險,只係估唔到天鴿連爆升都未爆升,咁快被人踢爆造假,未爆升過又點暴跌呢?追擊當日股價只係跌7%,沽空機構揀天鴿來追擊,真係唔多明。

病倒了 談一談止蝕

唔係掛!湊仔都湊到病!真係,湊仔絕對唔容易,特別係暑假期間日日33、34度高溫,真係好易出事!首先星期二下晝3點帶囝囝上泳班,森而趁有一個鐘時間就係烈日當空之下操水操左30個堂,當時唔覺身體有唔妥,到第二日就輪到朝早10點上足球班,原本以為又要係場邊曬一粒鐘,點知突然落起大雨,足球班被迫暫停,所有小朋友及家長走到場外一個涼亭避雨,由於雨勢一直未有減弱,最後要冒雨跑到車站搭車返屋企,上到車就知出事喇,冷氣超凍,囝囝當然有準備衫及褸,但自己就乜都冇預備,著住件濕衫死頂左一程車返到屋企,到下晝就開始覺得自己病,夜晚就已經發燒,就咁燒左兩日,其實森而真係唔怕熱同曬,最怕係凍同雨。


森而早幾日雖然病到死死下,但期間都仲有睇下書,除左上次提過既股票期權書之外,森而另外仲借左本書叫「海龜法則實踐心法」,森而雖然冇睇過暢銷名著「海龜投資法則」,但之前從黃國英系列書中已睇過關於海龜法則既描述,至於今次借到呢本應該算係延續編,主要講風險管理,咁啱森而上篇文章有幾位blog友睇完都善意地留言提醒森而要注意風險,既然如此,森而就借此談一談自己既風險管理方法,不過先旨聲明,本書森而仍未開始睇,而且森而並非專業投資者,以下所講既風險管理只係個人習慣而已。