2017年7月24日 星期一

牛市絕佳策略 - 草船借箭

森而6月中開始放假之後,7月中終於輪到囝囝放暑假,囝囝以前讀幼稚園既時候暑假只得兩個星期,今年小學第一次有個半月暑假放,囝囝當然覺得好開心,但對於家長個半月係非常漫長,要安排節目會非常之頭痛,囝囝開始放暑假頭三日已經自動自覺做晒暑期作業,一個星期左右已經安排去泳池及沙灘游水,之後一日再去食自助餐,另外又訂左酒店船飛準備8月尾去澳門玩兩日,至於由而家到8月尾呢段時間就報啲暑期興趣班比佢學下,不過森而並唔係怪獸家長,唔會要囝囝辛辛苦苦學十幾樣嘢,只係報兩個以玩為目的既班,包括足球班同游泳班,兩個班分別係賽馬會同康文署攪,幾十蚊就有交易,已經包埋所需用品如足球、波衫等,加埋一百蚊玩晒成個暑假,真係超級抵玩,完全符合森而一向既慳家本性。

幾十蚊學費包足球及波衫

講完囝囝講投資,最近大市已經進入牛市,相信冇乜人會反對,森而由上幾個月開始,眼見市況愈升愈有,決定用一招叫「草船借箭」既期權策略,主要對象係強勢股如1299、2318、2388等,呢招「草船借箭」於牛市時期非常好用,操作並不複雜但成功率高,啱晒近期市況使用,大家不妨可以參考下。

2017年7月17日 星期一

為何投資難守紀律

唔經唔覺森而已經放假整整一個月,對上一次可以放一個月假係囡囡出世,換言之已經係3年前既事,放假感覺真係好爽,可以做自己想做既事,本星期就完成左兩堂潛水,包括星期四晚泳池同星期日出海,如果計出海遊船河森而起碼10年未玩過,點知一出海就落雨,好彩落雨冇影響行程,仲知道原來好多香港人鍾意潛水,因為係我地附近仲有4、5隻船都玩緊潛水,大大話話有成5、60人係個海到,感覺好熱鬧。可能因為天氣唔好,今次潛水時能見度極低,第一次落到水底直情乜都見唔到,第一次玩就遇著呢種情況感覺都幾驚,幸好轉個位置後再嘗試就清啲,起碼見到教練指示,最後亦順利完成進度,教練話今次係一次好好既體驗,感覺好似夜潛,唔係人人有機會試到喎!

出海先嚟落雨

講返投資,上星期大市突然急升,恒指4日大升1000點,殺淡友一個措手不及,森而一向對後市不作預測,睇法永遠50/50,操作盡量保持紀律性並以機械式執行,好多時既有好倉亦有淡倉,今次急升有股票期權好倉錄得倍升,但上星期開倉既 HSI short strangle 卻損失不少,突然間諗起期權有一招 dynamic hedging 動態對沖,之前因為要返工無暇兼顧,而家既然放假就不如再重新再嘗試,睇下可唔可以救返呢次損失。

提到保持紀律性,上篇文章blog友留言話散戶容易自亂陣腳,容易左一巴右一巴,森而回覆話大多數散戶都無一套完整投資系統,無系統又何來紀律呢?今次想就呢個話題再講多啲,一般散戶係投資系統同紀律性上容易出現既問題。

2017年7月9日 星期日

沽完可買回 投機切記向前望

今個星期機乎每日都落雨,破壞左好多計劃,最慘係原本星期四上既潛水第二堂泳池,因為雷暴警告取消左,連帶星期日出海也要延期,非常失望!好彩其他計劃仍可進行,但就要雨中跑步,傻的嗎!

雨中跑步,傻的嗎!

講返正題,前幾日股市大跌,倉入面其中一隻股8008連跌幾日,收市價觸及止賺/蝕位(最後一次買入價-5%),於是第二日即時沽出,沽出價比高位相差不少,換言之即係賺少好多,正常人都會覺得好唔抵,而更唔抵係沽出之後股價就開始回升,一來一回簡直損失慘重,不過,森而心情冇受影響,既然交易系統已經設定好規則,就應該跟足指示操作,賺多賺少也沒有怨言,今次賺少左,就下次賺返。

8008係森而一直非常睇好,甚至認為未來會成為10倍股,自命高人既投資代言人,呢個時候一定會以智者口吻教訓人:唔應該短線炒賣,要睇內在價值,要長揸優質股......。如果作為一位初學者一定好buy呢類教條,但森而唔buy,因為當中犯左思維錯誤。

2017年7月5日 星期三

近況+投資組合 (內含負能樣)

唔經唔覺森而原來已經3個月冇寫Blog,初初因為忙冇時間寫,慢慢愈來愈懶冇心機寫,但到最近生活上發生一啲變化,所以決定從新再寫Blog,希望以前有睇開既Blog友仲未忘記森而,再繼續睇兼留言互相交流投資心得,甚至談天說地亦無任歡迎。

記得4月最後一篇文章提過森而決定要睇晒基金經理黃國英既書,到今日已經睇到第7本,可以話獲益良多,當中提供好多投資或投機心法,確實令森而改變一啲關於投資想法,亦將投資系統作出不少改進,詳細內容唔講,有興趣既朋友自己去圖書館借,雖然今日唔講黃國英,但想講下科斯托蘭尼,因為黃國英其中一本書內容提到科斯托蘭尼一句名句:有錢的人,可以投機;錢少的人,不可以投機;根本無錢的人,必須投機。按森而估計,睇得本Blog既人應該冇人唔知呢幾句來自邊到同咩意思,所以唔解釋,森而只想講當再次重溫呢句名言既時候,又再挑起森而既思想掙扎,無論係任何角度分析,森而都肯定屬於"根本無錢的人",加上近日生活上發生既變化,更加令森而確定自己屬"必須投機"一類,所以從今日起從新將投資方向定位為百分百投機,總之就係炒,直至炒到一日資產數字達標為止。

一次過睇7本黃國英,獲益良多

2017年4月11日 星期二

自己做基金經理

巴菲特、格拉咸、彼得林奇、芒格等投資大師名子經常被提起,因為每一位都戰績彪炳,頭上有光環,所以得到好多人祟拜同學習,當中少部份人甚至會迷信以為只有大師既投資哲學才是真理,實際成績反而係其次。森而咁講唔係想批評他人,能夠熟讀大師每一條教條一定係勤力既人,只不過大師和自己身處位置相距太遠,無論時代、市場、背景、資金等都無法可比,大師們各種教條真係適合2017年既香港嗎?係香港或中國會搵到可樂、廸廸尼、蘋果呢類超級企業嗎?既然森而主力係香港市場,要學習不如學習本土著名投資者,所以決定尋找本土既投資書籍逐一睇,先由著名基金經理「黃國英」開始。